Category: ରାଜନୀତି

ବିଧାନସଭାରେ ଶପଥ ସହ ନୂଆପଡ଼ାର ବିଧାୟକ ଭାବେ  ନୂଆ ଦାୟିତ୍ବ । ଜୟ ଢୋଲକିଆଙ୍କ ହାତରେ ସାଢେ ୩ ବର୍ଷରୁ କମ ସମୟ । ସେବା ପାଇଁ ସୁଯୋଗ ଦେଇଥିବା ନୂଆପଡାବାସୀଙ୍କୁ ଏବେ ପ୍ରତିଦାନର ସମୟ । ନିର୍ବାଚନରେ ଦେଇଥିବା ପ୍ରତିଶ୍ରୁତି ପୂରା କରିବା ଜୟଙ୍କ ପାଇଁ ବଡ଼ ଆହ୍ବାନ ।ସମୟ : ଅପରାହ୍ନ ୧ଟା ୧୧ ମିନିଟ୍ । ବିଧାନସଭା ପରିସରକୁ ଆସିଥିଲେ ନୂଆପଡ଼ାର ନବନିର୍ବାଚିତ ବିଧାୟକ ଜୟ ଢୋଲକିଆ । ପବିତ୍ର ଗୃହକୁ ଆସି ବଡ଼ ଦାୟିତ୍ବ ନେବା ପୂର୍ବରୁ ସମ୍ବିଧାନକୁ ମୁଣ୍ଡିଆ ମାରିଥିଲେ । ପରିବାର ସହ ଆସି ବିଧାୟକ ଭାବେ ଶପଥ ନେଇଥିଲେ ଜୟ ଢୋଲକିଆ । ପଦ ଓ ଗୋପନୀୟତାର ଶପଥପାଠ କରାଇଥିଲେ ବାଚସ୍ପତି ସୁରମା ପାଢୀ । ଏହି ଶପଥପାଠ ସମୟରେ ବିଜେପିର ବରିଷ୍ଠ ନେତୃବୃନ୍ଦ ମଧ୍ୟ ସାମିଲ ହୋଇଥିଲେ । ବିଧାୟକ ଭାବେ ଶପଥ ନେବା ପରେ  କହିଛନ୍ତି, ବିଶ୍ରାମ କରିବାର ସମୟ ସରିଛି, କାମ କରିବାର ସମୟ ଆସିଛି । ନୂଆପଡ଼ାର ସେବା ପାଇଁ ସୁଯୋଗ ମିଳିବା ସହ ଦାୟିତ୍ବ ବଢିଛି । ଏହାସହ ବାପାଙ୍କ ପ୍ରତି ବିଜେଡି ଯେଉଁ ଆଭିମୁଖ୍ୟ ଆପଣାଇଥିଲା ତାହାକୁ ଭୁଲିବିନି ବୋଲି କହିଛନ୍ତି ଜୟ । ବାପାଙ୍କ ଅସୁସ୍ଥତା ବେଳେ ସାଥିରେ ଛିଡ଼ା ହୋଇନଥିଲା ବିଜେଡି । ଅନ୍ୟପଟେ ମୁଖ୍ୟମନ୍ତ୍ରୀ ମୋହନ ମାଝୀ ମୋତେ ପୁଅ ଭଳି ସ୍ନେହ ଦେଇଛନ୍ତି । ଆଗକୁ ଭିଜନ, ନୂଆପଡ଼ାରେ ନିଯୁକ୍ତି ସୃଷ୍ଟି କରି ଦାଦନ ହ୍ରାସ କରିବୁ ।ଦମ୍ଭ ଦେଖାଇଛନ୍ତି ଜୟ । କହିଛନ୍ତି, ଆଗାମୀ ସାଢେ ୩ ବର୍ଷରେ ଡବଲ ଇଞ୍ଜିନ ସରକାରରେ ନୂଆପଡ଼ା ବିକାଶର ଶିଖର ଛୁଇଁବ । ନିର୍ବାଚନମଣ୍ଡଳୀରେ ପାନୀୟ ଜଳ, ଟେଲିକମ ସମସ୍ୟା ଦୂର କରିବା ସହ ନୂଆ ମେଡିକାଲ କଲେଜ ନିର୍ମାଣକୁ ପ୍ରାଥମିକତା ଦେବେ ବୋଲି କହିଛନ୍ତି ଜୟ ।

ନିର୍ବାଚନରେ ଜନ ସୁରାଜ ପାର୍ଟିର ପରାଜୟ ପରେ ଦଳର ପ୍ରତିଷ୍ଠାତା ତଥା ରାଜନୈତିକ ରଣନୀତିଜ୍ଞ ପ୍ରଶାନ୍ତ କିଶୋର ବିହାରବାସୀଙ୍କୁ କ୍ଷମା ମାଗିଛନ୍ତି । ତାଙ୍କ ଦଳର ଯଦି କିଛି ଭୁଲ ରହିଥାଏ ତେବେ ସେମାନେ ଆଗାମୀ ଦିନରେ ତାହାକୁ ସୁଧାରିବେ ବୋଲି ପିକେ କହିଛନ୍ତି । ଏହା ସହ ସେ ସିଧା ସିଧା କହିଛନ୍ତି ସେ ରାଜନୀତି ଛାଡିବେ ନାହିଁ । କାରଣ ସେ କୈାଣସି ପଦବିରେ ନାହାଁନ୍ତି । ସେ ବିହାର ଲୋକଙ୍କ କଥା କହିବେ । ଏନଡିଏ ଲୋକଙ୍କୁ ଦୁଇ ଲକ୍ଷ ଟଙ୍କା ଦେବା କଥା କହି ସରକାରଙ୍କୁ ଏଥିସହ ନୂଆ ସରକାର ଉପରେ ଜୋରଦାର ଆକ୍ରମଣ କରିଛନ୍ତି। ସେ ସରକାର ଗଠନ ପୂର୍ବରୁ କିଛି ଭ୍ରଷ୍ଟ ନେତାଙ୍କୁ ମନ୍ତ୍ରୀମଣ୍ଡଳରେ ସାମିଲ୍ ନ କରିବା ପାଇଁ ଚେତାବନୀ ଦେଇଛନ୍ତି ।
ପ୍ରଶାନ୍ତ କିଶୋର କହିଛନ୍ତି ଯେ, ସେ ପୂର୍ବରୁ କିଛି ଭ୍ରଷ୍ଟ ନେତାଙ୍କ ବିଷୟରେ କହିଥିଲେ । ଯଦିଓ ଜନତା ସେହି ନେତାମାନଙ୍କୁ ପୁଣି ଥରେ ବିପୁଳ ଜନମତ ଦେଇ ବିଜୟୀ କରାଇଛନ୍ତି । ତଥାପି ଏହି ଦାୟିତ୍ୱ ସରକାରଙ୍କର ଯେ ସେମାନଙ୍କୁ ମନ୍ତ୍ରୀମଣ୍ଡଳରେ ସାମିଲ୍ ନ କରନ୍ତୁ। ପ୍ରଶାନ୍ତ କିଶୋର ଚେତାବନୀ ଦେଇଛନ୍ତି ଯେ ଯଦି ସେହି ନେତାମାନଙ୍କୁ ପୁଣି ଥରେ ମନ୍ତ୍ରୀ ପଦରେ ସାମିଲ୍ କରାଯାଏ, ତେବେ ଜନ ସୁରାଜ ପାର୍ଟି ଆବଶ୍ୟକ ହେଲେ କୋର୍ଟର ଦ୍ୱାରସ୍ଥ ମଧ୍ୟ ହେବ। ତେବେ ସେହି ଭ୍ରଷ୍ଟ ନେତା କିଏ ତାଙ୍କର ନାମ ପିକେ କହିନାହାଁନ୍ତି ।
ସେ ଅଭିଯୋଗ କରିଛନ୍ତି ଯେ ପ୍ରତ୍ୟେକ ବିଧାନସଭା ଆସନରେ ଲୋକଙ୍କୁ ସରକାର ଲାଂଚ ଦେଲେ । ନିର୍ବାଚନ ପୂର୍ବରୁ ମହିଳାଙ୍କ ଆକାଉଁଟକୁ ଦଶହଜାର ଟଙ୍କା ପଠାଗଲା । ପ୍ରତି ଆସନରେ ଅତି କମରେ ୬୦,୦୦୦ରୁ ୬୨,୦୦୦ ଲୋକଙ୍କୁ ୧୦,୦୦୦ ଟଙ୍କା ଦିଆଯାଇଥିଲା ଏବଂ ୨ ଲକ୍ଷ ଟଙ୍କା ଋଣ ଦେବାର ପ୍ରତିଶ୍ରୁତି ଦିଆଯାଇଥିଲା। ଯାହା ଫଳରେ ଏନଡିଏକୁ ଅଧିକ ଭୋଟ ମିଳିଲା ।
ସେ ଅଭିଯୋଗ କରିଛନ୍ତି ଯେ ସରକାରୀ ଅଧିକାରୀମାନେ ଡ୍ୟୁଟିରେ ରହି ଲୋକଙ୍କୁ କହୁଥିଲେ ଯେ ଯଦି ଏନଡିଏ କ୍ଷମତାକୁ ଆସେ ତେବେ ଋଣ ମିଳିବ। ଏଥିପାଇଁ ଜୀବିକା ଦିଦିମାନଙ୍କୁ ମୋବିଲାଇଜର ଭାବରେ ବ୍ୟବହାର କରାଯାଇଥିଲା। ଯାହାର ଲାଭ ଏନଡିଏକୁ ମିଳିଲା । PK ନିର୍ବାଚନ କମିଶନଙ୍କ ଉପରେ ପ୍ରଶ୍ନ ଉଠାଇ କହିଛନ୍ତି ଯେ, ମତଦାନର ଅନ୍ତିମ ଦୁଇ ଘଣ୍ଟାରେ ୧୫-୨୦% ଭୋଟ୍ ବଢ଼ିବାର ଏକ ଅସ୍ୱାଭାବିକ ଢାଞ୍ଚା ଦେଖାଯାଇଛି, କିନ୍ତୁ ନିର୍ବାଚନ କମିଶନ ଏହାର ସବିଶେଷ ତଥ୍ୟ ସାର୍ବଜନୀନ କରିନାହାନ୍ତି।

କାଲି ନୂଆପଡ଼ା ଉପ ନିର୍ବାଚନର ଫଳାଫଳ । ଶୁକ୍ରବାର ସକାଳ ୮ଟାରୁ ଆରମ୍ଭ ହେବ ଭୋଟ୍ ଗଣତି । ଖୋଲିବ EVM । କାହା ସପକ୍ଷରେ ଆସିଛି ଜନାଦେଶ । ଧଡ଼ ଧଡ଼ ହେଲାଣି ପ୍ରାର୍ଥୀ ଛାତି । ୩୫୮ ବୁଥ ପାଇଁ ୧୪ଟି ଟେବୁଲର ବ୍ୟବସ୍ଥା କରାଯାଇଛି । ମୋଟ ୨୬ ରାଉଣ୍ଡ ଗଣତି ହେବ । ସକାଳ ୮ଟାରେ ପ୍ରଥମେ ବାଲଟ ପେପର ଗଣତି ହେବ । ଏହା ପରେ ୮ଟା ୩୦ରେ EVM ଖୋଲାଯାଇ ଗଣତି ହେବ । ସେପଟେ ଫଳାଫଳ ପୂର୍ବରୁ ଆରମ୍ଭ ହୋଇଯାଇଛି ରାଜନୈତିକ ବୟାନବାଜି । ବୁଥ୍ ରିଗିଂ ଅଭିଯୋଗକୁ ନେଇ ମୁହାଁମୁହିଁ ହୋଇଛନ୍ତି ବିଜେଡି ଓ ବିଜେପି ନେତା । ପ୍ରତି ଟେବୁଲ୍ ପାଇଁ ଜଣେ ଲେଖାଏଁ କାଉଣ୍ଟି ସୁପର ଭାଇଜର ଦାୟିତ୍ବରେ ରହିବେ । ତାଙ୍କୁ ସହଯୋଗ କରିବେ କାଉଣ୍ଟି ଆସିଷ୍ଟାଣ୍ଟ । ଜଣେ ମାଇକ୍ରୋ ଅବଜରଭର କାଉଣ୍ଟିଂ ଟେବୁଲରେ ରହିବେ । ଏହା ସହ ଭୋଟ ଗଣତି ପ୍ରକ୍ରିୟାକୁ ତଦାରଖ କରିବେ ରିଟର୍ଣିଂ ଅଫିସର । ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା ଭିତରେ ରହିବ ଭୋଟ୍ ଗଣତି କେନ୍ଦ୍ର । ନୂଆପଡ଼ା ନ୍ୟାସନାଲ କଲେଜ୍ରେ ହୋଇଥିବା ଷ୍ଟ୍ରଙ୍ଗ ରୁମ୍ ଓ ଭୋଟ୍ ଗଣତି କେନ୍ଦ୍ରକୁ ଜଗି ରହିଛନ୍ତି ସଶସ୍ତ୍ର ସୁରକ୍ଷା ବାହିନୀ । ଏଥି ସହ ଦୁଇ କମ୍ପାନୀ କେନ୍ଦ୍ରୀୟ ସୁରକ୍ଷା ବଳଙ୍କୁ ମଧ୍ୟ ମୁତୟନ କରାଯାଇଛି ।

ସେପଟେ ଭୋଟ୍ ଗଣତି ପୂର୍ବରୁ ଆରମ୍ଭ ହୋଇଯାଇଛି ରାଜନୈତିକ ବୟାନବାଜି | ବୁଥ ରିଗିଂ କୁ ନେଇ ମୁହାଁ ମୁହିଁ ହୋଇଛନ୍ତି ବିଜେଡି ଓ ବିଜେପି ନେତା । ବିଜେଡିର ଅଭିଯୋଗ ନୂଆପଡ଼ା ଉପନିର୍ବାଚନ ପାଇଁ ଭୋଟିଂ ବେଳେ ବୁତ୍ ରିଗିଂ କରିଛି ଶାସକ ଦଳ ବିଜେପି । ୪୧ଟି ବୁଥରେ ଭୋଟ ହାର ୯୧ ପ୍ରତିଶତରୁ ଅଧିକ ହୋଇଛି । ଯାହା ପୂର୍ବରୁ କେବେ ଦେଖିବାକୁ ମିଳିନାହିଁ | ଏହା ଜନାଦେଶ ନା ଯନ୍ତ୍ରାଦେଶ ବୋଲି ପ୍ରଶ୍ନ କରିଛି ବିଜେଡି | ଏହି ୪୧ଟି ବୁଥର ସିସିଟିଭି ଫୁଟେଜ ଦେଖାଇବାକୁ ଦାବି କରିଛି ଦଳ ।

ଏଥର ନୂଆପଡା ଭୋଟିଂରେ ରେକର୍ଡ କରିଥିବା ବେଳେ ଫଳାଫଳକୁ ନେଇ ସାଧାରଣରେ ବଢ଼ିଛି ଉତ୍କଣ୍ଠା । ନୂଆପଡ଼ା ଫଳାଫଳ ସରକାର ଉପରେ ସିଧା ସଳଖ କୌଣସି ପ୍ରଭାବ ପକାଉନଥିଲେ ମଧ୍ୟ ପ୍ରମୁଖ ୩ ରାଜନୈତିକ ଦଳ ଭିତରୁ କିଏ ଏକ-ଦୁଇ ଓ ତିନି ନମ୍ବରରେ ରହିବେ ତା’ ଉପରେ ରହିଛି ନଜର । କାରଣ ଏହି ପୋଜିସନ ହିଁ ତିନି ପ୍ରମୁଖ ରାଜନୈତିକ ଦଳର ଦଶା ଓ ଦିଶାକୁ ପ୍ରମାଣିତ କରିବ ।

ବିହାର ରେ ଦ୍ୱିତୀୟ ପର୍ଯ୍ୟାୟ ମତଦାନ ଚାଲିଛି, ଏବଂ ସକାଳ ୭ଟାରୁ ମତଦାନ ଆରମ୍ଭ ହୋଇଛି। ୧୨୨ ଆସନରେ ଭୋଟର ୧,୩୦୨ ପ୍ରାର୍ଥୀଙ୍କ ଭାଗ୍ୟ ନିର୍ଣ୍ଣୟ କରୁଛନ୍ତି। ରାଜ୍ୟରେ ଅପରାହ୍ନ ୧ଟା ସୁଦ୍ଧା ବିହାରରେ ୪୭.୬୨% ମତଦାନ ହୋଇଛି।

ଆରାରିଆର ଫୋର୍ବସଗଞ୍ଜରେ ବିଜେପି ଏବଂ କଂଗ୍ରେସ ସମର୍ଥକଙ୍କ ମଧ୍ୟରେ ମୁହାଁମୁହିଁ ହୋଇଥିଲା। ସୁରକ୍ଷା କର୍ମୀଙ୍କୁ ବଳ ପ୍ରୟୋଗ କରି ହସ୍ତକ୍ଷେପ କରିବାକୁ ପଡିଥିଲା। ଫୋର୍ବସଗଞ୍ଜ କଲେଜର ୧୯୮ ନମ୍ବର ପୋଲିଂ ବୁଥ୍‌ରେ ଏହି ଘଟଣା ଘଟିଛି। କଂଗ୍ରେସ ସମର୍ଥକମାନେ ଅଭିଯୋଗ କରିଛନ୍ତି, ବିଜେପି ବିଧାୟକ ଏବଂ ଏନଡିଏ ପ୍ରାର୍ଥୀ କଂଗ୍ରେସ ଭୋଟରଙ୍କୁ ମାଡ଼ ମାରିବାକୁ ନିର୍ଦ୍ଦେଶ ଦେଇଥିଲେ। ଏହା ଶୁଣି କଂଗ୍ରେସ କର୍ମୀମାନେ ଉତ୍ତେଜିତ ହୋଇ ପୋଲିଂ ବୁଥ ବାହାରେ ହଙ୍ଗାମା କରିବାକୁ ଲାଗିଲେ। ଏସଡିଓ ରଞ୍ଜିତ କୁମାର କହିଛନ୍ତି ଯେ, କୌଣସି ଲାଠିଚାର୍ଜ ହୋଇନାହିଁ ଏବଂ ପରିସ୍ଥିତି ଏବେ ଶାନ୍ତ ଅଛି।

ନୂଆପଡ଼ା ଉପନିର୍ବାଚନ ପାଇଁ ସରିଲା ପ୍ରଚାର । ଆସନ୍ତା ୧୧ ତାରିଖରେ ପଡିବ ଭୋଟ୍ । କିଛି ଦିନ ଧରି ଏହି ଉପ ନିର୍ବାଚନ ନୂଆପଡାବାସୀଙ୍କୁ ଦେଉଛି ନୂଆ ଅନୁଭୂତି । ସକାଳ ହେଲେ ମାଳ ମାଳ ନେତା ଆଉ ସେମାନଙ୍କ ମାରାଥନ ପ୍ରଚାର । ଯେଉଁ ଗାଁର ରାସ୍ତାରେ ଦିନେ ଗୋଟିଏ ଗାଡି କାଁ ଭାଁ ଦେଖା ଯାଉଥିଲା ସେଠି ନାମୀ ଦାମୀ ଗାଡି ଦୌଡିଲା ଆଉ ହେଲିକପ୍ଟର ଓହ୍ଲାଇଲା । ତେବେ ଆଜି ସେହି ପ୍ରଚାରରେ ପୂର୍ଣ୍ଣଚ୍ଛେଦ ପଡିଛି । ନିର୍ବାଚନ ଆଚରଣ ସଂହିତା ଅନୁଯାଇ ସନ୍ଧ୍ୟା ୪ ଟାରୁ ଆରମ୍ଭ ହୋଇଛି ସାଇଲେନ୍ସ ପିରିୟଡ । ସବୁ ପୋଲିଂ ଶାନ୍ତିଶୃଙ୍ଖଳାରେ ହେବ । ୫୭ ସମ୍ବେଦନଶୀଳ ବୁଥ୍ ଅଛି ।  ସବୁ ବୁଥ୍‌ରେ ପୋଲିସ ବ୍ୟବସ୍ଥା ହୋଇଛି । କେନ୍ଦ୍ରୀୟ ସୁରକ୍ଷା ବଳ ମଧ୍ୟ ମୁତୟନ ଅଛନ୍ତି । ସାଇଲେଣ୍ଟ ଆୱାରରେ ଏକାକୀ ପ୍ରାର୍ଥୀ ଘର ଘର ବୁଲି ପ୍ରଚାର କରିପାରିବେ । ରାତି ୧୦ଟା ପରେ ସମ୍ପୂର୍ଣ୍ଣ ପ୍ରଚାର ବନ୍ଦ ରହିବ ବୋଲି ମୁଖ୍ୟ ନିର୍ବାଚନ ଅଧିକାରୀ କହିଛନ୍ତି ।ତେବେ ଶେଷ ଦିନରେ ତିନି ପ୍ରମୁଖ ଦଳ ଶେଷ ପ୍ରଚାର କରିଛନ୍ତି । ଆଉ ପ୍ରଚାରର ମଙ୍ଗ ଧରିଛନ୍ତି ନିଜେ ପ୍ରାର୍ଥୀ । ତିନି ପ୍ରମୁଖ ଦଳ ବିଜେପି ପ୍ରାର୍ଥୀ ଜୟ ଢୋଲକିଆ, ବିଜେଡ଼ିର ସ୍ନେହାଙ୍ଗିନୀ ଛୁରିଆ, କଂଗ୍ରେସ ପ୍ରାର୍ଥୀ ଘାସିରାମ ମାଝୀ ।ନୂଆପଡ଼ା ଉପ ନିର୍ବାଚନ ତାରିଖ ଘୋଷଣା ପରଠୁ ତିନି ପ୍ରମୁଖ ଦଳ ଏହି ସିଟ୍ ହାତେଇବା ପାଇଁ ପ୍ରଚାରକୁ ଗୁରୁତ୍ବ ଦେଇଥିଲେ । ବିଜେପିର ଷ୍ଟାର ପ୍ରଚାରକ ଭାବେ ମୁଖ୍ୟମନ୍ତ୍ରୀ ମୋହନ ମାଝୀ ତିନି ଥର ନୂଆପଡା ଆସି ପ୍ରଚାର କରିଥିଲେ । ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ ନୂଆପଡାକୁ ଦୁଇ ଥର ଆସି ରୋଡ୍ ଶୋ’ ଓ ସାଧାରଣ ସଭା କରିଛନ୍ତି ।ଅନ୍ୟପଟେ କଂଗ୍ରେସ ପ୍ରଚାରରେ ପଛରେ ପଡିଯାଇଥିଲା । ରେବନ୍ତ ରେଡ୍ଡି, କହେଁୟା କୁମାରଙ୍କ ଭଳି ନେତାଙ୍କୁ ଷ୍ଟାର ପ୍ରଚାରକ ତାଲିକାରେ ରଖିବା ସତ୍ତ୍ବେ ରାଜ୍ୟ ନେତୃତ୍ବ ହିଁ କଂଗ୍ରେସ ପ୍ରଚାରର ମଙ୍ଗ ଧରିଥିଲେ । ସେପଟେ ସମାଜବାଦୀ ପାର୍ଟି ପ୍ରାର୍ଥୀ ରମାକାନ୍ତ ହାତୀଙ୍କ ପ୍ରଚାର ପାଇଁ ଶେଷ ଦିନରେ ସମାଜବାଦୀ ପାର୍ଟି ରାଷ୍ଟ୍ରୀୟ ଅଧ୍ୟକ୍ଷ ଅଖିଳେଶ ସିଂ ଯାଦବ ଆସିଥିଲେ ।

ବିହାର ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟରେ ରେକର୍ଡ ସଂଖ୍ୟାରେ ମତଦାନ ହୋଇଛି । ମତଦାନ ସକାଳ ୭ଟାରୁ ଆରମ୍ଭ ହୋଇ ସନ୍ଧ୍ୟା ୬ଟାରେ ଶେଷ ହୋଇଥିଲା । ସଂଧ୍ୟା ୬ଟା ସୁଦ୍ଧା ୬୪.୬୬ ପ୍ରତିଶତ ମତଦାନ ରେକର୍ଡ କରାଯାଇଛି । ନିର୍ବାଚନ କମିଶନ ଦାବି କରିଛନ୍ତି ଯେ ଚଳିତ ଥର ପ୍ରଥମ ପର୍ଯ୍ୟାୟରେ ରେକର୍ଡ ଭୋଟିଂ ହୋଇଛି ।

ଏହା ପୂର୍ବରୁ ୨୦୦୦ରେ ବିହାରରେ ୬୨ ପ୍ରତିଶତ ମତଦାନ ହୋଇଥିଲା । ଚଳିତ ବର୍ଷ ଭୋଟିଂ ୬୪ ପ୍ରତିଶତରୁ ଅଧିକ ହୋଇଛି । ଏହା ଇତିହାସରେ ସର୍ବାଧିକ ଭୋଟିଂ । ୨୦୨୦ରେ ହୋଇଥିବା ବିଧାନସଭା ନିର୍ବାଚନରେ ୫୭ ପ୍ରତିଶତରୁ ଅଧିକ ମତଦାନ ହୋଇଥିଲା । ଦ୍ୱିତୀୟ ପର୍ଯ୍ୟାୟରେ ଭୋଟିଂ ପ୍ରତିଶତ ଅଧିକ ରହିଲେ ଏହି ନିର୍ବାଚନ ଇତିହାସରେ ଲିପିବଦ୍ଧ ହୋଇଯିବ ।

ନିର୍ବାଚନ କମିଶନ ପାଟନାରେ ସାମ୍ବାଦିକ ସମ୍ମିଳନୀ କରି କହିଛନ୍ତି, ଗଣତନ୍ତ୍ରର ପର୍ବ ବିହାରର ଗର୍ବର ଅବସର, ଅର୍ଥାତ୍ ବିଧାନସଭା ନିର୍ବାଚନ ୨୦୨୫ର ପ୍ରଥମ ପର୍ଯ୍ୟାୟରେ ଐତିହାସିକ ୬୪.୬୬% ମତଦାନ ରେକର୍ଡ କରାଯାଇଛି । ବିହାର ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟ ଆଜି ଶାନ୍ତିପୂର୍ଣ୍ଣ ପରିବେଶରେ ସମାପ୍ତ ହୋଇଛି । ବିହାରର ଇତିହାସରେ ସର୍ବାଧିକ ମତଦାତା ନିଜ ମତାଧିକାର ସାବ୍ୟସ୍ତ କରିଥିଲେ ।

ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାର, ନିର୍ବାଚନ କମିଶନର ସୁଖବୀର ସିଂହ ସନ୍ଧୁ ଏବଂ ବିବେକ ଯୋଶୀଙ୍କ ସହିତ, ଲାଇଭ୍ ୱେବକାଷ୍ଟିଂ ମାଧ୍ୟମରେ ମତଦାନକୁ ତଦାରଖ କରିଥିଲେ । ବିହାରରେ ପ୍ରଥମ ଥର ପାଇଁ ଶତ ପ୍ରତିଶତ ମତଦାନ କେନ୍ଦ୍ର ୱେବକାଷ୍ଟ କରାଯାଇଥିଲା । ମୁକ୍ତ, ନିରପେକ୍ଷ, ନିର୍ଭୟ ନିର୍ବାଚନ ଏବଂ ମତଦାନକୁ ସୂଚାରୁ ଭାବେ କରିବା ପାଇଁ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାର ବ୍ୟକ୍ତିଗତ ଭାବରେ ଇସିଆଇ ନିୟନ୍ତ୍ରଣ କକ୍ଷରୁ ପ୍ରିଜାଇଡିଂ ଅଧିକାରୀ ଏବଂ ଉପ ନିର୍ବାଚନ ଅଧିକାରୀଙ୍କ ସହିତ ଆଲୋଚନା କରିଥିଲେ ।

ଆଜି ରାଜ୍ୟର ୧୮ଟି ଜିଲ୍ଲାର ୧୨୧ଟି ବିଧାନସଭା ନିର୍ବାଚନ ମଣ୍ଡଳୀରେ ମତଦାନ ହୋଇଥିଲା । ଏହି ପର୍ଯ୍ୟାୟରେ ମୋଟ ଭୋଟରଙ୍କ ସଂଖ୍ୟା ୩ କୋଟି ୭୫ ଲକ୍ଷରୁ ଅଧିକ ଥିଲା । ବିହାରରେ ପ୍ରଥମ ଥର ପାଇଁ ଦକ୍ଷିଣ ଆଫ୍ରିକା, ଇଣ୍ଡୋନେସିଆ, ଥାଇଲ୍ୟାଣ୍ଡ, ଫିଲିପାଇନ୍ସ, ବେଲଜିୟମ ଏବଂ କଲମ୍ବିଆରୁ ୧୬ ଜଣ ପ୍ରତିନିଧି ଆନ୍ତର୍ଜାତୀୟ ନିର୍ବାଚନ ପରିଦର୍ଶକ କାର୍ଯ୍ୟକ୍ରମ (IEVP) ଅଧୀନରେ ନିର୍ବାଚନ ପ୍ରକ୍ରିୟା ପର୍ଯ୍ୟବେକ୍ଷଣ କରିଥିଲେ । ପ୍ରତିନିଧିମାନେ ବିହାର ନିର୍ବାଚନକୁ ପ୍ରଶଂସା କରି ଏହାକୁ ଆନ୍ତର୍ଜାତୀୟ ସ୍ତରରେ ସବୁଠାରୁ ସୁସଂଗଠିତ, ସ୍ୱଚ୍ଛ, ଦକ୍ଷ ନିର୍ବାଚନ ମଧ୍ୟରୁ ଗୋଟିଏ ବୋଲି କହିଥିଲେ ।